《Heavenly Bodies》由獨立團隊 2pt Interactive 開發，係一款物理模擬解謎遊戲，支援單機雙人合作。玩家扮演一位太空人，去到宇宙組裝最尖端嘅太空站並令系統投入運作，整個過程只有身處地球嘅指揮部無線電通訊協助，其他野必需靠你自己完成，當中包括組裝太空望遠鏡、維護精巧太陽能電池板、研究宇宙植物學、採集隕石樣本等等。不過要注意所有野都係處於太空無重力狀態下，亦即係話任何工作都變得更困難更難掌握。

上面有講過，喺呢隻遊戲入面嘅操作極為獨特，唔係傳統左菇行右菇轉視點咁玩。官方強烈建議本作要用返有雙冬菇嘅手制玩，左右冬菇分別係控制左右手臂、L2R2（LTRT）就係操作手腕到手指嘅動作、L1R1（LBRB）就係操作左右腳，由於要分開操作四肢，就算係調教發射器角度咁簡單嘅動作都好難搞，如果兩位玩家合作遊玩的話難度就更高。雖然本作操作需要具備一定技巧，但係製作團隊都唔想大家玩都無癮，所以有得自訂控制模式難度以及重新綁定控制按鍵。

《Heavenly Bodies》已於 12 月 7 日推出，對應平台為 PS5、PS4 及 PC Steam，支援繁體中文。